Frå venstre: Birgitte Vaagen Rekdal (styremedlem i B&T Vaagens stiftelse), Turid Vaagen (styreleiar i B&T Vaagens stiftelse), ordførar Dag Vaagen og kunstnaren Torild Malmedal Storvik Einar Arne Ekroll

Skulpturen “Storlaksen” er gitt i gåve til Sande kommune frå B&T Vaagens stiftelse, og kunstnar er Torild Storvik Malmedal. Skulpturen vart sett opp i midten av juli.

– På vegne av Sande kommune, skal eg takke B&T Vaagens Stiftelse for denne på alle vis storslåtte gåva, og takk til kunstnaren som har skapt meisterverket.

– Me det eg veit er dette den første kunstskulpturen som er reist, i alle fall utandørs, i Sande. Såleis er vi på pionerferd, seier Dag Vaagen, ordførar i Sande kommune.

Avdukinga starta oppe ved rasteplassen “Doperla” på Drageskaret, der skulpturen er utstilt. Her vart det sagt nokre ord, offisiell opning og bilet-taking, før resten av arrangementet vart flytta til kommunestyresalen på Sande rådhus, for å kome inn frå regnet.

Einar Arne Ekroll

Kunstnar, Torild Storvik Malmedal, frå Eide fortalde om skulpturen of korleis ho gjekk fram med å lage laksen med vinkelslipar og dremler.

– Det var gøy at med ein gong den kom på plass her oppe på Drageskaret, sat det born på ryggen til laksen. Det er akkurat det som er meint med Storelaksen, det er ein interaktiv skulptur som kan leikast og klatrast på, sa Malmedal.

Styreleiar i B&T Vaagens stiftelse, Turid Vaagen, fortalde om bakgrunnen for gåva og kvifor den vil vere eit godt tilskot på rasteplassen.

– Vi hadde ambisjonar om å få til eit symbol på fisken og havet som livsgrunnlag her. Vi tenkte ikkje på laks spesifikt, men vi tenkte det kunne vore fint ettersom den har hatt stor plass i historia om kyst-Noreg. Det var i tillegg eit ynskje om ein kunstnar frå same fylket, og tenk det blei det! 

– Eg veit at på folkemunne har plassen skulpturen står på eit namn eg blir sjenert av å seie, “do-perla”, men kanskje den heller no kan kallast “Lakse-plassen”? seier Turid Vaagen.

Helsing frå Billedhoggerforeninga

Norsk Billedhoggerforening kunne dessverre ikkje delta på avdukinga, men hadde dette å seie:

– Vi er svært glade for å kunne bidra til at Sande kommune har fått ein heilt eigen “Storlaks” av vårt medlem Torill Storvik Malmedal! Vi gratulerer både kunstnaren, kommunen og samarbeidspartnarar for ei storslagen plassering og flott utføring. Tusen takk til B&T Vaagens stiftelse for det vi meiner er er den flottaste gåva ein kan gi, nemleg kunst til folket!