Adobe Stock

Statsforvaltaren konkluderer med at budsjettet er realistisk, i balanse og behandla på lovleg måte. Dette betyr at kommunen kan halde fram arbeidet med å utvikle tenester og møte behova til innbyggjarane innanfor trygge økonomiske rammer.

Godkjenning av lån for 2026

I tillegg til årsbudsjettet har Statsforvaltaren godkjent:

• lån til investeringar på 5 006 000 kroner
• startlån i Husbanken på 4 000 000 kroner

Dette gir kommunen handlingsrom til å gjennomføre planlagde investeringar som kjem innbyggjarane til gode.

Tett oppfølging – og tydeleg retning vidare

Sande kommune har dei siste åra hatt økonomiske utfordringar. Godkjenninga viser likevel at kommunen no er på rett veg, og at dei tiltaka som er sett i verk gir effekt.

Statsforvaltaren peikar på at det framleis er behov for tydelege prioriteringar og god styring framover. Kommunedirektøren og kommunestyret må difor jobbe vidare med å:

• sikre betre kontroll med driftsutgiftene
• tilpasse tenestene til inntektsnivået
• følgje opp den vedtekne tiltaksplanen for å dekkje inn tidlegare meirforbruk

Felles innsats for gode tenester

Kommunedirektør og politisk leiing takkar alle tilsette for innsatsen som er lagt ned i ein krevjande periode. Det gode samarbeidet mellom einingar, økonomiavdeling og politisk nivå har vore avgjerande for å få budsjettet godkjent.

-Sande kommune står framfor viktige val og omstillingar, men kommunen har no eit godkjent budsjett som grunnlag for vidare arbeid, seier kommunedirektør Renathe Rossi Aglen.

Kommunedirektør Renathe Rossi Aglen Silje S. Mork

På veg mot ein meir berekraftig økonomi

Godkjenninga frå Statsforvaltaren er eit positivt steg i rett retning og gir Sande kommune eit styrka grunnlag for å fortsetje arbeidet mot ein meir berekraftig økonomi – og sikre gode tenester for innbyggjarane, både no og i framtida.