Norgesferie på hjul: Alt på eitt nett

Nettsida vegvesen.no/turist gir deg svar på det du lurer på som reisande turist på norske vegar. Det viktigaste er å køyre trafikksikkert og vise omsyn.

Trine Kanter Zerwekh i Statens vegvesen presenterer den nye nettsida for turistar på veg. – Her finn du nyttige tips for turen, og det viktigaste er å ta vare på både trafikksikkerheita og framkome for alle, seier ho. Statens vegvesen

Når mange skal på ferie samtidig, kan det bli kaotisk på smale vegar – spesielt når mange reiser med bubil, campervan eller campingvogn. Då kan det bli både utrygt og vanskeleg for andre reisande, som køyrer personbil, motorsykkel eller syklar.

Reglar, råd og nyttige tips

– Nettsida vegvesen.no/turist finst både på norsk og engelsk, og gir informasjon som skal bidra til tryggare trafikk og betre framkome. Her finn du også mykje nyttig for bubil- og campingturistar, slik at dei kan ta meir omsyn – både til andre trafikkantar og til lokalbefolkninga, seier Trine Kanter Zerwekh i Nasjonale turistvegar.

På nettsida finn du:

Dei viktigaste trafikkreglane
Korleis du køyrer trygt med bubil og campingvogn
Informasjon om veg- og køyreforhold
Bompengar og fartsgrenser
Tips for trygg ferdsel med motorsykkel og sykkel

Ersfjordstranda langs Nasjonal turistveg Senja. Rasteplassane er laga for korte stopp – ikkje for overnatting Trine Kanter Zerwekh

Rasteplassar er ikkje campingplassar

Ein stor utfordring med bubilturistar er at mange overnattar på rasteplassar som ikkje er meint for camping. Dette gjer at andre turistar ikkje får stoppa for ein kort pause, og det kan skape både trafikkproblem og farlege situasjonar.

– Rasteplassar er laga for korte stopp, ikkje for overnatting. Bruk heller tilrettelagde campingplassar og overnattingsstader, seier Trine Kanter Zerwekh.
Ho oppmodar også alle til å forlate rasteplassar og toalett slik du sjølv ønskjer å finne dei – og til å følgje campingvettreglane: campingvettregler-2025.pdf