Sande kommune er framleis registrert i ROBEK, og økonomiplanen byggjer på omfattande omstillingsarbeid i heile organisasjonen. Samstundes viser framlegget at kommunen når måltalet for netto driftsresultat frå 2027 og gradvis byggjer opp att økonomiske reservar i slutten av planperioden.
Vidare omstilling og tilpassing til nye behov
Kommunen opplever færre barn og unge, medan talet på eldre aukar. Dette fører til at ressursbehovet gradvis flyttar seg frå oppvekstområdet til helse- og omsorgstenestene. Samstundes er det foreslått ei rekkje tiltak for å tilpasse drifta til kommunen sine økonomiske rammer.
I oppvekstsektoren vert det lagt opp til vidare arbeid med ny oppvekststruktur, felles skuleorganisering og tilpassing av bemanninga som følgje av redusert barnetal. Innan helse og omsorg vil arbeidet med omstilling, innsatstrappa og berekraftige tenester halde fram for å møte aukande behov i åra som kjem.
Store investeringar dei komande åra
Det er foreslått investeringar for om lag 48,85 millionar kroner i 2027. Dei største prosjekta er:
- Ny brannstasjon på Larsnes med ei ramme på 25 millionar kroner i 2027
- Oppgraderingar i oppvekstsektoren med 10 millionar kroner i 2027
- Oppgradering av vatn- og avløpsanlegg
- IKT-investeringar og mindre infrastrukturtiltak
Kommunedirektøren peikar på at kommunen ikkje har økonomisk handlingsrom til å gjennomføre alle investeringsbehov samtidig. Oppgradering av skulebygg må derfor gjennomførast stegvis gjennom planperioden.
Eigedomsskatt og frie inntekter
Framlegget legg til grunn at eigedomsskatten vert auka frå 1 til 2 promille i 2027, med vidare opptrapping i økonomiplanperioden. Samstundes foreslår kommunedirektøren å avvikle ordninga med lokalt redusert formuesskatt frå 2027. Frie inntekter, inkludert skatt, inntektsutjamning og rammetilskot, er budsjettert til om lag 252 millionar kroner i 2027. Mykje av veksten går med til å dekkje løns-, pris- og pensjonsvekst.
Betre økonomisk balanse
Økonomiplanen viser at kommunen når måltalet om eit netto driftsresultat på minimum 1,75 prosent av brutto driftsinntekter frå 2027. Samstundes vert det foreslått å bruke planperioden til å dekkje inn tidlegare års meirforbruk på til saman om lag 42 millionar kroner. Disposisjonsfondet er planlagt bygd oppatt frå 2029.
Politisk behandling
Budsjett- og økonomiplanframlegget skal no behandlast politisk før endeleg vedtak i kommunestyret i desember. Innbyggjarar, organisasjonar og andre interesserte vil få moglegheit til å setje seg inn i framlegget når det vert lagt ut til offentleg ettersyn.
Sjå budsjettframlegget her