DSB

Direktoratet for samfunnstryggleik og beredskap (DSB) tilrår at alle husstandar i Noreg tek nokre enkle grep for å betre eigenberedskapen sin. På sikkerhverdag.no finn du konkrete råd som DSB har laga for alle innbyggjarar. Her finn du mellom anna døme på kva du bør ha i beredskapslageret heime for å klare deg i minst sju dagar.

Kvifor eigenberedskap er viktig

Samfunnet vårt er godt rusta for å handtere ulike typar kriser, men det kan oppstå situasjonar der kvar enkelt av oss må klare oss sjølve i ein periode. Døme på slike situasjonar kan vere straumbrot, ekstremvêr eller andre hendingar som påverkar samfunnets vanlege funksjonar. Eigenberedskap handlar om å vere i stand til å dekkje grunnleggjande behov som mat, vatn, varme og kommunikasjon i minst sju døgn utan ekstern hjelp.

Kva inneheld brosjyren?

Den nye brosjyren, som alle får tilsendt, inneheld oppdaterte råd og rettleiing om eigenberedskap. Informasjonen er laga for å vere enkel å forstå og praktisk å følgje. Her får du tips om kva du bør ha i beredskapslageret ditt, som vatn, matvarer med lang haldbarheit, batteridrivne lykter og andre nødvendigheiter. Brosjyren er basert på oppdaterte råd frå Direktoratet for samfunnstryggleik og beredskap (DSB) og vart også publisert på sikkerhverdag.no tidlegare i år. På DSB si nettside vil du også finne mange andre gode tips og råd til eigenberedskap. Der ligg også videoar med meir informasjon både generelt og med teiknspråktolking.

Brosjyre

Korleis kan du førebu deg?

• Set saman eit beredskapslager: Start med å samle varer og utstyr du og familien treng for sju døgn.
• Sjekk lista i brosjyren: Den gir ei detaljert oversikt over kva du bør ha tilgjengeleg.
• Følg med på informasjon: Hald deg oppdatert på nyheiter og vêrmeldingar, spesielt dersom ei krise er under oppsegling.
• Bruk gjerne DSB si sjekkliste for eigenberedskap.